“Аймгаараа гүйж, аз жаргал түгээе” уриатай “Өвөрхангай марафон-2026” бүх нийтийн гүйлтийн тэмцээн өнгөрсөн амралтын өдрүүдэд боллоо.

Энэ жилийн марафонд гэр бүл, найз нөхөд, хамт олноороо оролцсон хүмүүс олон байлаа. Мөн баг, хамт олноороо ижил хувцас, уриатай оролцсон нь тэмцээний уур амьсгалыг илүү өнгөлөг, сонирхолтой болгожээ.

Тухайлбал, “Lion Cub” волейболын клубийн сурагчид “Мод тарьж, ногоон ирээдүйг бүтээе” уриа дэвшүүлэн модны суулгац барьж гүйснээрээ олны анхаарлыг татсан байна. Тэд спортын үйл ажиллагааг байгаль хамгаалах санаачилгатай уялдуулснаараа онцлог байв.

Энэ удаагийн марафонд гадаадын иргэдээс гадна хөдөө сумдын малчин эмэгтэйчүүд оролцсон нь тэмцээний онцлох агшнуудын нэг байлаа. Тэд “Түрүүлэхээс илүү өөрийгөө сорих, идэвхтэй хөдөлгөөнд хэвшихийг зорьсон” хэмээн ярьж байсан юм.