Цахилгаан дугуй, суррон, скүүтер, мопедны хэрэглээнд анхаарах цаг аль хэдийн иржээ

Сүүлийн жилүүдэд Монголын гудамж, зам талбайд цахилгаан дугуй, скүүтэр, мопед, Sur-Ron зэрэг өндөр хүчин чадалтай цахилгаан мотоцикл олноор гарч ирсэн нь хөдөлгөөний шинэ соёлыг бий болгож байна. Гэвч энэ өөрчлөлттэй зэрэгцэн осол, гэмтэл эрс нэмэгдэж, ялангуяа хүүхэд, залуусын эрүүл мэндэд ноцтой аюул учруулж эхэллээ.

Монгол Улсад энэ төрлийн тээврийн хэрэгслийн ослыг ангилан бүртгэдэг нэгдсэн статистик хангалтгүй ч эмнэлэг, цагдаагийн байгууллагын мэдээлэл бодит нөхцөл байдлыг тодорхой харуулж байна.

Цагдаагийн ерөнхий газар болон Замын цагдаагийн алба-ны тайланд дурдсанаар жил бүр хэдэн арван мянган зам тээврийн осол бүртгэгддэг бөгөөд сүүлийн жилүүдэд цахилгаан тээврийн хэрэгслээс үүдэлтэй ослын эзлэх хувь нэмэгдсээр...

Эмнэлгийн байгууллагуудын мэдээлэл илүү анхаарал татна.

 Гэмтэл согог судлалын үндэсний төв-д зуны улиралд өдөрт дунджаар 5–15 хүн цахилгаан скүүтэр, мопед, Sur-Ron төрлийн хэрэгслээс үүдэлтэй гэмтэлтэйгээр ханддаг. Эдгээрийн дийлэнх нь 10–25 насны хүүхэд, залуус эрсдэлд хамгийн ихээр өртөж байна.

Толгойн гэмтэл нийт тохиолдлын 40–60 хувийг эзэлж, гар, хөлний хугарал 30–40 хувь, бусад зөөлөн эдийн гэмтэл үлдсэн хувийг бүрдүүлж байна. Хамгийн аюултай нь хамгаалалтын малгай (дуулга) хэрэглэдэг хувь 10 хувьд ч хүрэхгүй байгаа явдал юм.

Хүүхдийн төв эмнэлэг-ийн эмч нарын ажиглалтаар зуны улиралд осолд өртөгсдийн 30–50 хувь нь хүүхэд байдаг. Энэ нь насанд хүрээгүй хүүхдүүд жолоодох, хяналтгүй хэрэглэх, хамгаалалтгүй зорчихтой шууд холбоотой. Эдгээр цахилгаан хэрэгслийг хэрэглэхэд 14 нас хүрсэн байх шаардлагатай байдаг ч бага насны хүүхдүүд ихээр хэрэглэж, бэртэж гэмтэж байгаа бөгөөд эцэг эхчүүдийн хараа хяналт дутмаг байгааг харж болно.

Ялангуяа Sur-Ron төрлийн цахилгаан мотоцикл хамгийн өндөр эрсдэлтэйд тооцогдож байна. 60–80 км/цагийн хурдтай явдаг эдгээр хэрэгслийг жолооны үнэмлэхгүй, хамгаалалтын хэрэгсэлгүй ашиглах нь ноцтой ослын гол шалтгаан болж байна. Мөн цахилгаан скүүтэрийг явган хүний зам дээр ашигласнаар явган зорчигчид хүртэл эрсдэлд орж байгаа нь шинэ төрлийн аюул үүсгэж байна.

Анхаарах зүйлс: / Монголд гарч буй ослуудыг ажиглахад дараах нийтлэг шалтгаанууд давамгайлж байна /

• Дуулга, хамгаалалтын хэрэгсэл хэрэглэхгүй байх
• Хэт хурд (ялангуяа Sur-Ron)
• Насанд хүрээгүй жолоодлого
• Замын хөдөлгөөний зохицуулалт сул
• Тусгай зам, дэд бүтэц байхгүй
• Орой, шөнийн цагт зорчих

Эдгээр хүчин зүйлс нь ослыг зөвхөн нэмэгдүүлэх биш, харин илүү хүнд гэмтэл, тэр дундаа тархины гэмтэлд хүргэж байна.

     Харин дэлхийн хэмжээнд цахилгаан скүүтэр, e-bike зэрэг микро-мобилити хэрэгслээс үүдэлтэй осол сүүлийн жилүүдэд огцом өссөн бөгөөд зөвхөн 2017–2022 онд 360 мянга гаруй хүн гэмтэж, 200 гаруй хүн амь насаа алдсан байна. Судалгаагаар толгойн гэмтэл нийт ослын 30–40 хувийг эзэлдэг бол хамгаалалтын дуулга хэрэглээ маш бага буюу зарим тохиолдолд 10 хувиас доош байна. Мөн дэлхийд осолд өртөгсдийн дийлэнх нь залуус бөгөөд зарим судалгаагаар ослын 30 гаруй хувь нь согтууруулах ундаатай холбоотой, шөнийн цагаар ихэвчлэн гардаг байна.

Үүнээс үзэхэд ганцхан Монголд биш, харин дэлхий даяар тулгарч байгаа шинэ төрлийн асуудал юм. 

Цахилгаан тээврийн хэрэгсэл нь хурдан, хямд, байгальд ээлтэй ч буруу хэрэглэвэл амь насанд аюултай.

Бид дор бүрнээ хариуцлагтай байж

• Дуулга өмсөх
• Хурд хэтрүүлэхгүй байх
• Насанд хүрээгүй бол хэрэглэхгүй байх
• Замын дүрмийг мөрдөх зэрэг энгийн алхамуудыг хэрэгжүүлэх нь өөрийн төдийгүй бусад олон хүний амь насыг аварч, осол аюулаас хамгаалж чадна.